اورنگزیب آئی ایم ایف، ورلڈ بینک اجلاسوں کے لیے بینکاک روانہBusiness

وزیر خزانہ کے پروگرام میں بین الاقوامی مالیاتی اداروں، وزرائے خزانہ، پالیسی سازوں، ترقیاتی شراکت داروں، عالمی سرمایہ کاروں، بینکوں، کریڈٹ ریٹنگ ایجنسیوں، تھنک ٹینکس اور میڈیا نمائندوں کے ساتھ 60 سے زائد اعلیٰ سطحی ملاقاتیں شامل ہیں۔

اعلامیے کے مطابق وزیر خزانہ آئی ایم ایف اور ورلڈ بینک گروپ کی قیادت سے ملاقاتوں کے ساتھ انٹرنیشنل فنانس کارپوریشن (آئی ایف سی) اور ملٹی لیٹرل انویسٹمنٹ گارنٹی ایجنسی (مِگا) کے عہدیداروں سے بھی بات چیت کریں گے، جس میں پاکستان کی معاشی صورتحال، اصلاحات کی پیش رفت، نجی شعبے کی ترقی اور مستقبل کے تعاون پر توجہ مرکوز ہوگی۔

وزیر خزانہ آئی ایم ایف کے منیجنگ ڈائریکٹر کے اجلاس میں بھی شرکت کریں گے، جس میں مشرق وسطیٰ، شمالی افریقہ، افغانستان اور پاکستان (میناپ) خطے کے وزرائے خزانہ، مرکزی بینکوں کے گورنرز اور علاقائی مالیاتی اداروں کے سربراہان شامل ہوں گے۔

دو طرفہ محاذ پر، سینیٹر اورنگزیب سعودی عرب، چین، ترکیہ، ایران، برطانیہ اور میزبان ملک تھائی لینڈ کے ہم منصبوں سے اعلیٰ سطحی ملاقاتیں کریں گے، جن کا مقصد اقتصادی، سرمایہ کاری، تجارتی اور ترقیاتی تعاون کو مضبوط بنانا ہے۔ وہ امریکی محکمہ خزانہ کے عہدیداروں سے بھی ملاقات کریں گے۔

سرمایہ کاری کی ترغیب پر خاص توجہ مرکوز ہوگی؛ وزیر خزانہ سرمایہ کاری سیمینارز، خودمختار سرمایہ کار فورمز اور معروف بین الاقوامی مالیاتی اداروں کے ساتھ گول میز مباحثوں میں شرکت کریں گے، جن میں جے پی مورگن، سٹی، ڈوئچے بینک، اسٹینڈرڈ چارٹرڈ، ایم یو ایف جی، بارکلیز اور بینک آف امریکا سمیت دیگر ادارے شامل ہیں۔

اسی طرح تینوں بڑی عالمی خودمختار کریڈٹ ریٹنگ ایجنسیوں — فچ ریٹنگز، موڈیز اور ایس اینڈ پی گلوبل — سے بھی ملاقاتیں طے ہیں، جن میں پاکستان کی معاشی اور اصلاحاتی پیش رفت بین الاقوامی سرمایہ کاروں کے سامنے رکھی جائے گی۔

وزیر خزانہ کثیرالجہتی فورمز، بشمول جی-24 وزرائے خزانہ اور مرکزی بینک گورنرز اجلاس، سترہویں وی-20 وزارتی مکالمے اور آب و ہوا سے متعلق اقدامات کے لیے وزرائے خزانہ کے اتحاد کے سولہویں وزارتی اجلاس میں بھی شریک ہوں گے۔ وہ علی بابا انٹرنیشنل ڈیجیٹل کامرس کے ساتھ پاکستان کی ڈیجیٹل معیشت اور ای کامرس کے مواقع پر بھی بات چیت کریں گے۔

اعلامیے میں کہا گیا ہے کہ یہ دورہ پاکستان کی بین الاقوامی اقتصادی اور مالیاتی برادری کے ساتھ فعال مشغولیت اور بحال شدہ معاشی استحکام کو سرمایہ کاری، پیداواریت، برآمدات، روزگار اور پائیدار و جامع معاشی ترقی میں بدلنے کے حکومت کے عزم کا اظہار کرتا ہے۔