میرپور: آزاد کشمیر کے 79 ویں یوم تاسیس کی مرکزی تقریب آجMirpurmirpur

تقریب میں سیاسی رہنماؤں، انتظامی افسران، سول سوسائٹی کے نمائندوں، صحافیوں، طلبہ، وکلاء اور شہریوں کی بڑی تعداد کی شرکت متوقع ہے۔ ضلعی انتظامیہ نے شہریوں سے اپیل کی ہے کہ وہ یوم تاسیس کی تقریبات میں بھرپور شرکت کریں۔

یوم تاسیس کے موقع پر میرپور شہر کو دلہن کی طرح سجا دیا گیا ہے۔ سرکاری عمارتوں کو برقی قمقموں سے روشن کیا گیا ہے جبکہ آزاد کشمیر اور پاکستان کے جھنڈے نمایاں مقامات پر لہرائے گئے ہیں۔ شہر کے داخلی اور خارجی راستوں پر یوم تاسیس کی اہمیت اجاگر کرنے والے بینرز بھی آویزاں کیے گئے ہیں۔

ضلعی انتظامیہ کے مطابق میرپور کے تعلیمی اداروں میں یوم تاسیس کے حوالے سے خصوصی پروگرام منعقد کیے جائیں گے جن میں تقاریر، قومی نغمے اور تعلیمی سرگرمیاں شامل ہوں گی۔ ان پروگراموں کا مقصد طلبہ کو آزاد کشمیر کی تاریخ، تحریک آزادی کشمیر اور شہیدوں کی قربانیوں سے روشناس کرانا ہے تاکہ نئی نسل اپنی شناخت اور تاریخ سے واقف رہ سکے۔

اس کے علاوہ تعلیمی اداروں اور مختلف مقامات پر کھیلوں کے مقابلے اور دیگر سرگرمیاں بھی منعقد ہوں گی جن کا مقصد نوجوانوں میں نظم و ضبط، صحت مند مشاغل، ہم آہنگی اور قومی یکجہتی کو فروغ دینا ہے۔ انتظامیہ کا کہنا ہے کہ ان سرگرمیوں سے نوجوان نسل میں مثبت سرگرمیوں کا رجحان بڑھے گا۔

واضح رہے کہ آزاد کشمیر میں یوم تاسیس ہر سال 24 اکتوبر کو منایا جاتا ہے۔ یہ دن ریاست کے قیام کی یاد تازہ کرتا ہے اور تحریک آزادی کشمیر، ریاستی شناخت اور قومی ہم آہنگی کے عزم کی تجدید کا موقع فراہم کرتا ہے۔ یوم تاسیس کے موقع پر ریاست بھر میں پرچم کشائی کی تقریبات منعقد کی جاتی ہیں جن میں عوام کی بڑی تعداد شرکت کرتی ہے۔