کرپٹو صارفین کے تحفظ کیلئے ورچوئل اثاثہ جات الائنس قائمBusiness

اتحاد کیا کرے گا؟

اتحاد کے رہنماؤں کے مطابق اس پلیٹ فارم کا مقصد کرپٹو سے وابستہ تمام اداروں، پلیٹ فارمز اور صارفین کو ایک جگہ اکٹھا کرنا ہے تاکہ پاکستان میں ورچوئل اثاثوں کی صنعت کو منظم، شفاف اور مؤثر بنایا جا سکے۔ اتحاد سرمایہ کاروں میں آگاہی پیدا کرنے، سائبر سکیورٹی کی تعلیم کو فروغ دینے اور بین الاقوامی بہترین طریقوں کو اپنانے پر توجہ دے گا۔ اتحاد پالیسی سازی کے حوالے سے باخبر گفتگو کو فروغ دینے، مارکیٹ کے شرکا کے درمیان تعاون مضبوط کرنے اور پاکستان کی ورچوئل اثاثہ صنعت کی عالمی سطح پر نمائندگی کرنے کا بھی ارادہ رکھتا ہے۔

پریس کانفرنس میں وائس چیئرمین احتشام حمدانی نے بتایا کہ پاکستان کرپٹو اپنانے کے عالمی انڈیکس میں دنیا بھر میں تیسرے نمبر پر ہے۔ انہوں نے واضح کیا کہ پاکستان میں دو کروڑ کرپٹو صارفین ہونے کا تخمینہ غیر مصدقہ ہے اور ملک میں کرپٹو صارفین اور سرمایہ کاری کے حجم کے بارے میں فی الحال کوئی قابل اعتماد ڈیٹا موجود نہیں۔ اتحاد آزاد تحقیق اور مقامی اداروں کے تعاون سے اس شعبے کا قابل بھروسہ ڈیٹا تیار کرنے کا ارادہ رکھتا ہے تاکہ درست اعداد و شمار کی بنیاد پر فیصلے کیے جا سکیں۔

رہنماؤں نے واضح کیا کہ یہ اتحاد کوئی ریگولیٹری ادارہ نہیں ہے اور اسے حکومت کی توثیق حاصل نہیں ہے۔ یہ کسی سرکاری یا ریگولیٹری ادارے کا متبادل نہیں بلکہ عوام اور متعلقہ حکام کے درمیان پل کا کردار ادا کرے گا۔ اتحاد جلد یونیورسٹیوں میں کرپٹو سے متعلق آگاہی کی مہم بھی شروع کرے گا تاکہ نوجوان سرمایہ کاروں کو اس شعبے کے مواقع اور خطرات سے آگاہ کیا جا سکے۔