
رانا ثنا اللہ: بلاول اور محسن نقوی بھائی بھائی ہیں، صدر دونوں کو بٹھا کر سمجھائیںPakistan
رانا ثنا اللہ نے کہا ہے کہ بلاول بھٹو زرداری اور محسن نقوی ایک ہی گھر کے دو بھائیوں کی حیثیت رکھتے ہیں، اور صدر آصف علی زرداری کو چاہیے کہ وہ دونوں کو اپنے پاس بٹھا کر سمجھائیں کہ اس نوعیت کی گفتگو سے پیچھے ہٹ جائیں۔

وزیراعظم کے مشیر برائے سیاسی امور رانا ثنا اللہ نے کہا ہے کہ پیپلز پارٹی کے چیئرمین بلاول بھٹو زرداری اور وفاقی وزیر داخلہ محسن نقوی ایک ہی گھر کے دو بھائیوں کی حیثیت رکھتے ہیں، اور صدر آصف علی زرداری کو چاہیے کہ وہ دونوں کو اپنے پاس بٹھا کر سمجھائیں کہ اس نوعیت کی گفتگو سے پیچھے ہٹ جائیں۔
ایک نجی ٹی وی پروگرام میں گفتگو کرتے ہوئے رانا ثنا اللہ نے کہا کہ حکومتی اتحاد میں شامل جماعتوں کے رہنماؤں کی جانب سے سرعام ایک دوسرے کے خلاف بیان بازی مناسب نہیں، باہمی اختلافات کو افہام و تفہیم سے حل کیا جانا چاہیے تاکہ سیاسی ماحول میں تلخی پیدا نہ ہو اور اتحادیوں کے درمیان ہم آہنگی برقرار رہے۔
رانا ثنا اللہ کے مطابق صدر آصف علی زرداری دونوں رہنماؤں کے لیے والد کی حیثیت رکھتے ہیں۔ انہوں نے کہا کہ صدر دونوں کو سمجھا دیں کہ ایسی گفتگو سے پیچھے ہٹ جائیں، اور نئے صوبوں کا معاملہ بھی صدر مملکت کے اپنے گھر میں موجود ہے، اس لیے صدر کو چاہیے کہ وہ اس مسئلے کو حل کریں۔
وزیراعظم کے مشیر نے کہا کہ محسن نقوی کو نگران وزیراعلیٰ اور پھر وزیر داخلہ بنانے میں آصف زرداری کا 60 فیصد حصہ ہے، اور جب بھی وہ صدر سے ملنے گئے، محسن نقوی ان کا استقبال کرتے ہیں۔ انہوں نے کہا کہ نئے صوبوں کا منصوبہ محسن نقوی کا اپنا نہیں ہو سکتا، اور بلاول بھٹو زرداری نے حالیہ دنوں میں سنجیدہ گفتگو کی ہے، تاہم صوبوں کا معاملہ پارلیمنٹ میں آئے گا تو ہی کوئی سمت اختیار کرے گا۔
رانا ثنا اللہ کا کہنا تھا کہ وفاقی وزیر اطلاعات کو اپنی رائے دینے سے روکنا نہیں چاہیے، اور اگر صوبوں کا معاملہ پارلیمنٹ میں آتا تو بلاول بھٹو کو وہیں بات کرنی چاہیے تھی۔ انہوں نے بلاول کے اس بیان کو بھی درست نہیں قرار دیا کہ خون خرابہ ہو گا، اور کہا کہ صدر مملکت دوسرے بیٹے کو بھی ملاقات میں بلا لیتے۔
یہ بیانات صدر زرداری اور وزیراعظم شہباز شریف کی کچھ دیر قبل ہونے والی ملاقات کے بعد سامنے آئے، جس کے بعد بلاول بھٹو زرداری نے بھی صدر سے ون آن ون ملاقات کی تھی جس میں تحمل اور مذاکرات پر اتفاق ہوا تھا۔ رانا ثنا اللہ نے کہا کہ ملاقاتیں ہوتی رہیں گی اور معاملات بات چیت سے حل ہونے چاہئیں۔






