زیادہ کھانا اور تمباکو نوشی دل کی صحت کے لیے خطرناک، ماہرین کی وارننگHealth

اس موقع پر ڈاکٹر جاوید اے خان نے زور دیا کہ طرز زندگی میں تبدیلی اب ناگزیر ہو چکی ہے اور باقاعدہ جسمانی سرگرمی مختلف بیماریوں کے خطرے کو کم کرنے میں مدد دے سکتی ہے۔ انہوں نے تمباکو نوشی اور تمباکو کی دیگر صورتوں سے گریز کا مشورہ دیتے ہوئے کہا کہ تمباکو صحت کے لیے مضر ہے اور احتیاطی تدابیر سے متعلق بیماریوں کے خطرات کو نمایاں طور پر کم کیا جا سکتا ہے۔

<h2>دل کے امراض وبائی صورت اختیار کرتے جا رہے ہیں</h2> آغا خان یونیورسٹی کے اسسٹنٹ پروفیسر آف کارڈیالوجی ڈاکٹر یاور سعید نے کہا کہ پاکستان میں امراض قلب وبائی صورت اختیار کرتے جا رہے ہیں، اور گزشتہ ایک دہائی میں نوجوانوں میں دل کے دورے کے کیسز میں بھی اضافہ دیکھا گیا ہے۔

انہوں نے خوراک میں اعتدال کی اہمیت پر زور دیتے ہوئے مشورہ دیا کہ زیادہ کھانے سے گریز کیا جائے اور متوازن و غذائیت بخش خوراک اپنائی جائے۔ ان کے مطابق مثبت طرز زندگی میں تبدیلی امراض قلب کے پھیلاؤ کو کم کرنے میں نمایاں کردار ادا کر سکتی ہے۔

ماہرین کے مطابق پاکستان میں دل کے امراض میں اضافے کی بڑی وجوہات میں غیر متوازن خوراک، فاسٹ فوڈ کا بڑھتا ہوا استعمال، تمباکو نوشی اور جسمانی سرگرمی کی کمی شامل ہیں، اور ان پر قابو پائے بغیر بیماریوں کے بوجھ کو کم نہیں کیا جا سکتا۔

<h2>مفت طبی سہولتیں</h2> کراچی پریس کلب کے سیکرٹری محمد اسلم خان نے طبی کیمپ کے انعقاد پر آغا خان یونیورسٹی اسپتال کا شکریہ ادا کرتے ہوئے کہا کہ نجی صحت سہولتیں عام مریضوں کی پہنچ سے باہر ہوتی جا رہی ہیں۔

کیمپ میں مختلف طبی ٹیسٹ کیے گئے، جن میں ایکو کارڈیوگرام اور ای سی جی کے علاوہ امراض قلب اور امراض پھیپھڑوں کی مشاورت شامل تھی، اور بڑی تعداد میں صحافیوں نے شرکت کی۔

منتظمین کے مطابق اس طرح کے طبی کیمپ صحافی برادری کے لیے مفت معائنوں کا موقع فراہم کرتے ہیں اور عوام میں صحت کے بارے میں آگاہی بڑھانے میں مدد دیتے ہیں۔