آزاد کشمیر: اسحاق ڈار کی وزیراعظم اور صدر سے ملاقاتAzad Kashmir

اسحاق ڈار نے امید ظاہر کی کہ آزاد جموں و کشمیر کی نئی حکومت وہاں کے عوام کی امنگوں پر پورا اترے گی۔ ان کا کہنا تھا کہ عوام کی ضروریات اور امنگوں کے مطابق خطے کے عوام کی فلاح و بہبود اور خوشحالی کے لیے حکومتِ پاکستان پوری طرح پرعزم ہے۔

اسی روز نائب وزیراعظم اسحاق ڈار نے آزاد جموں و کشمیر کے صدر نجیب نقی سے بھی الگ سے ملاقات کی۔ دفتر خارجہ کے بیان کے مطابق اس ملاقات میں بھی آزاد کشمیر کی ترقی، معاشی نمو اور سماجی ترقی کے فروغ کے لیے مسلسل کوششوں کی اہمیت پر تبادلہ خیال کیا گیا، اور خطے کی ترقیاتی ضروریات پوری کرنے کے لیے مشترکہ حکمتِ عملی کی ضرورت پر زور دیا گیا۔

علاوہ ازیں وزیراعظم کے مشیر برائے بین الصوبائی رابطہ سینیٹر رانا ثناء اللہ سے بھی وزیراعظم آزاد جموں و کشمیر سید افتخار علی گیلانی نے اسلام آباد میں ملاقات کی، جس میں باہمی دلچسپی کے امور، خطے کی ترقی اور عوام کو درپیش مسائل پر گفتگو ہوئی۔ ملاقات میں آزاد کشمیر کے عوام کی بہتری، نوجوانوں کے لیے تعلیم اور ان کی مثبت سرگرمیوں میں شمولیت کے امور بھی زیرِ بحث آئے۔

اس موقع پر وزیراعظم آزاد کشمیر سید افتخار علی گیلانی نے کہا کہ آزاد جموں و کشمیر میں ترقیاتی عمل کو مؤثر بنانے اور عوامی مسائل کے حل کے لیے وہ وفاقی حکومت کے تعاون اور معاونت کے شکر گزار ہیں۔ ان کے بقول عوام کی خوشحالی، صحت، نوجوانوں کی تعلیم و سکلز ڈویلپمنٹ اور بہتر روزگار کے مواقع پیدا کرنا ان کی حکومت کی اولین ترجیحات میں شامل ہے۔

رانا ثناء اللہ نے اس عزم کا اظہار کیا کہ وزیراعظم محمد شہباز شریف کی قیادت میں حکومت آزاد جموں و کشمیر کی ترقی، خوشحالی اور عوام کی فلاح و بہبود کے لیے اپنی کوششیں جاری رکھے گی۔ انہوں نے نوجوانوں کی صلاحیتوں کو بروئے کار لانے، انہیں بہتر مستقبل فراہم کرنے اور عوامی مسائل کے حل کے لیے باہمی تعاون کی اہمیت کو اجاگر کیا۔