ایران پر نئی امریکی پابندیاں: 16 افراد، 10 ادارے نشانے پرWorld

نئی پابندیوں کی زد میں آنے والے اداروں میں عراق کا انٹرنیشنل ڈویلپمنٹ بینک فار انویسٹمنٹ اینڈ فنانس (آئی ڈی بی) بھی شامل ہے، جس پر امریکا کا الزام ہے کہ اس نے ایران کو امریکی ڈالر تک رسائی فراہم کی اور ایران کے سرکاری اداروں اور عراق میں ایران سے وابستہ مسلح گروہوں کے ساتھ تعلقات قائم رکھے۔ محکمہ خزانہ کا کہنا ہے کہ یہ کارروائی “آپریشن اکنامک آؤٹ کاسٹ” کے تحت کی گئی ہے، جو اسی سال اگست میں شروع کی گئی ایک مہم ہے۔

پابندیوں میں ایران کے دو مبینہ آف شور بینک بھی شامل ہیں: جزیرہ انٹرنیشنل بینک کمپنی اور چابہار انٹرنیشنل بینک اوورسیز کمپنی، جنہیں بالترتیب بینک ملت اور بینک شہر سے وابستہ قرار دیا گیا ہے۔ ایرانی شہری سید روح اللہ رضوی پر الزام ہے کہ وہ تیل کی فروخت سے حاصل ہونے والی آمدنی کو خفیہ بینکاری نیٹ ورکس کے ذریعے منتقل کرتے تھے اور اس سے قبل نیشنل ایرانی آئل کمپنی کی جانب سے ماہانہ لاکھوں بیرل تیل کی بیرون ملک ترسیل میں معاونت کرتے رہے۔ ان سے منسلک دو ایرانی کمپنیوں کو بھی پابندیوں کا نشانہ بنایا گیا ہے۔

اس کے علاوہ بینک شہر سے وابستہ فراب سروخ قشم کمپنی کے سات ملازمین پر بھی الزام لگایا گیا ہے کہ انہوں نے ہانگ کانگ اور متحدہ عرب امارات میں شیل کمپنیوں کے ذریعے ایران کے تیل کی فروخت سے منسلک غیر ملکی کرنسی کے لین دین کی ہم آہنگی کی۔ محکمہ خارجہ نے کیوبا کے بینکو انٹرنیشنل دے کومرسیو کو بھی پابندیوں میں شامل کیا ہے، جس پر الزام ہے کہ وہ کم از کم 2022 سے ایران کے کرافرین بینک کو خدمات فراہم کر رہا تھا۔

محکمہ خزانہ کے مطابق یہ اقدامات ایگزیکٹو آرڈر 13902 کے تحت کیے جا رہے ہیں، جو ایران کی مالیاتی اور پٹرولیم شعبوں کو ہدف بناتا ہے۔ بیان میں کہا گیا ہے کہ شیل کمپنیوں اور مشرق وسطیٰ و ایشیا میں غیر ملکی کرنسی کے ماہرین کے ذریعے کروڑوں ڈالر منتقل کرنے والے اداروں کو ختم کیا جا رہا ہے۔ واشنگٹن نے انتباہ کیا ہے کہ ایران کے لیے منی لانڈرنگ یا پابندیوں سے بچنے میں معاونت کرنے والے ادارے امریکی مالیاتی نظام تک رسائی کھو سکتے ہیں۔ یہ اعلان ایسے وقت میں ہوا ہے جب امریکا اور ایران کے درمیان تناؤ برقرار ہے اور آبنائے ہرمز میں جہاز رانی متاثر ہو رہی ہے۔