پاکستان میں ایل پی جی مہنگی، سرحد کی بندش بڑی وجہ قرارPakistan

نوٹس کی محرک عالیہ کامران نے ایوان کو بتایا کہ ملک کے دور دراز اور شمالی علاقوں میں ایل پی جی 700 سے 800 روپے فی کلو گرام کے حساب سے فروخت ہو رہی ہے، جبکہ آئل اینڈ گیس ریگولیٹری اتھارٹی (اوگرا) کی مقرر کردہ سرکاری قیمت 280 روپے فی کلو گرام ہے۔ ان کا کہنا تھا کہ سرکاری نرخ اور بازار میں وصول کی جانے والی قیمت کے درمیان یہ فرق عام صارفین کے لیے ناقابل برداشت بوجھ بن چکا ہے۔

ایل پی جی ان دور دراز علاقوں میں بڑے پیمانے پر استعمال ہوتا ہے جہاں پائپ گیس موجود نہیں۔ سردیوں میں اس کی کھپت بڑھ جاتی ہے، جس سے گھریلو بجٹ پر دباؤ مزید بڑھتا ہے۔

نعیمہ کشور نے سوال اٹھایا کہ حکومت نے ایران کے ساتھ سرحدی تجارت کیوں معطل کی ہے۔ اس پر وزیر نے جواب دیا کہ پاکستان کی ضرورت کا 50 سے 60 فیصد ایل پی جی ایران سے درآمد کیا جاتا تھا جبکہ باقی ضرورت قطر سے پوری کی جاتی تھی۔ ان کے مطابق امریکہ ایران جنگ کے باعث قطر سے ایل پی جی کی سپلائی معطل ہو گئی ہے، جس نے مجموعی سپلائی کی صورتحال کو مزید مشکل بنا دیا ہے۔

وزیر نے ایوان کو بتایا کہ حکومت پورے نظام کا جائزہ لے رہی ہے اور بیرون ملک سے گیس حاصل کرنے کے دیگر ذرائع کے حصول کے لیے ایک پالیسی پر کام کر رہی ہے۔ انہوں نے اوگرا کی مقرر کردہ 280 روپے فی کلو گرام کی سرکاری قیمت سے اتفاق کیا، تاہم یہ بھی تسلیم کیا کہ اضافی سپلائی کے دوران بھی گیس کہیں سرکاری نرخ پر فروخت ہوتی نظر نہیں آتی۔

بحث سے واضح ہوا کہ مسئلہ صرف سپلائی کا نہیں بلکہ قیمتوں کے نفاذ کا بھی ہے۔ ارکان نے سرکاری نرخ پر عملدرآمد کا مطالبہ کیا تاکہ دور دراز علاقوں کے عوام کو ریلیف مل سکے۔