رائیونڈ اجتماع کا پہلا مرحلہ مکمل، دوسرا مرحلہ 12 نومبر سےPakistan

لاہور ٹریفک پولیس نے اجتماع کے لیے جامع ٹریفک پلان جاری کیا ہے۔ رائیونڈ روڈ، سندر روڈ اور مانگا روڈ سمیت سات داخلی راستے مقرر کیے گئے ہیں جبکہ ٹریفک کی روانی برقرار رکھنے کے لیے دس مقامات پر ڈائیورشن پوائنٹس قائم کیے گئے ہیں۔

شرکاء کی گاڑیوں کے لیے مختلف مقامات پر پارکنگ کا انتظام کیا گیا ہے، جہاں 2,800 بڑی گاڑیوں، 5,400 کاروں اور 10,000 موٹر سائیکلوں کی گنجائش مختص کی گئی ہے۔ ٹریفک انتظامات کے لیے مجموعی طور پر 1,103 افسران و اہلکار تعینات کیے گئے ہیں، جن میں سات ڈی ایس پیز، 203 انسپکٹرز اور سینئر ٹریفک وارڈنز اور 866 ٹریفک وارڈنز اور اسسٹنٹس شامل ہیں۔ 15 لفٹرز اور نو بریک ڈاؤن گاڑیاں بھی ڈیوٹی پر رہیں گی۔

اختتامی دعا اور شرکاء کی واپسی کے پیش نظر اتوار کی صبح 6 بجے سے دوپہر ایک بجے تک رائیونڈ جانے والے تمام اہم راستے ٹریفک کے لیے بند رہیں گے۔ چیف ٹریفک آفیسر لاہور سید عبدالرحیم شیرازی کے مطابق اختتامی دعا کے موقع پر رائیونڈ سٹی آنے والی شاہراہوں پر شرکاء کی گاڑیوں کو یکطرفہ چلایا جائے گا جبکہ رائیونڈ جانے والی ٹریفک معطل رہے گی۔

پاجیاں موڑ، قزلباش چوک، موٹروے اور ٹھوکر نیاز بیگ تک رائیونڈ روڈ پر دونوں اطراف یکطرفہ ٹریفک چلائی جائے گی۔ بھوبتیاں چوک سے موہلنوال، سندر روڈ، مانگا روڈ، کوٹ رادھا کشن روڈ اور سوئے آصل روڈ پر بھی خصوصی ٹریفک پلان نافذ ہوگا۔ انخلاء کے دوران موٹروے اور رنگ روڈ سے رائیونڈ کی جانب ٹریفک کو اترنے کی اجازت نہیں ہوگی۔

شرکاء کی واپسی کے لیے پہلے موٹر سائیکل اور رکشہ اسٹینڈز، پھر کار اور ویگن اسٹینڈز اور آخر میں بس اور ٹرک اسٹینڈز خالی کروائے جائیں گے۔ ٹریفک پولیس نے شہریوں کو اس دوران رائیونڈ روڈ پر سفر سے گریز کرنے کی ہدایت کی ہے، جبکہ ٹریفک رہنمائی کے لیے ہیلپ لائن 15 پر رابطہ کیا جا سکتا ہے۔

دوسری جانب ڈپٹی کمشنر لاہور کیپٹن (ر) محمد علی اعجاز نے اجتماع گاہ کا دورہ کر کے انتظامات کا جائزہ لیا۔ انتظامیہ کے مطابق اجتماع میں 109 ممالک کے زائرین شریک ہیں۔ طبی سہولیات، پارکنگ اور صفائی کے انتظامات یقینی بنانے کی ہدایات بھی جاری کی گئی ہیں۔

رائیونڈ اجتماع دنیا کے بڑے مذہبی اجتماعات میں شمار ہوتا ہے، جس میں پاکستان بھر اور بیرون ملک سے ہزاروں افراد شریک ہوتے ہیں۔ اختتامی دعا کے بعد شرکاء کی جماعتیں تشکیل دی جاتی ہیں جو تبلیغ کے لیے ملک کے مختلف حصوں اور بیرون ملک روانہ ہوتی ہیں۔