پنجاب: نرسنگ اساتذہ کے لیے 285 اسکالرشپس، پی ایچ ڈی بیرون ملک اور ایم ایس سی این پاکستان میںPakistan

یہ اقدام پنجاب نرسنگ اینڈ ہیلتھ ورک فورس ریفارم پروگرام کے تحت کیا گیا ہے۔ اس کا مقصد صرف ڈگری دلانا نہیں، بلکہ نرسنگ اساتذہ کی تدریسی صلاحیت اور تحقیقی مہارت کو بھی بہتر بنانا ہے، تاکہ نرسنگ کے طلبہ کو معیاری تعلیم اور تربیت مل سکے۔

اسکالرشپ کے پورے عمل کی نگرانی پروگرام امپلیمنٹیشن یونٹ (پی آئی یو) کرے گا، جو اسپیشلائزڈ ہیلتھ کیئر اینڈ میڈیکل ایجوکیشن ڈیپارٹمنٹ کے تحت کام کرتا ہے۔ حکومت مقررہ تعداد میں نشستیں مکمل ہونے تک مرحلہ وار اسکالرشپ دے گی۔

درخواست صرف وہ فیکلٹی ممبران دے سکتے ہیں جو صوبے کے سرکاری نرسنگ اداروں میں خدمات انجام دے رہے ہوں اور اپنے منتخب پروگرام کی تعلیمی اور پیشہ ورانہ شرائط پر پورا اترتے ہوں۔ درخواست دینے سے پہلے اہلیت کے تفصیلی معیار کو پروگرام کی سرکاری ویب سائٹ (piuhealthpunjab.com) پر ضرور دیکھ لیں۔

طریقہ کار یہ ہے: پہلے ویب سائٹ سے اہلیت اور درخواست کی تفصیلات دیکھیں، پھر مقررہ فارم پُر کریں اور تعلیمی اسناد، متعلقہ یونیورسٹی اور پروگرام کی تفصیلات سمیت ضروری دستاویزات تیار کریں۔ جن امیدواروں کو یونیورسٹی کی طرف سے داخلے کی پیشکش مل چکی ہے، وہ داخلے کا خط بھی ساتھ لگائیں۔

مکمل درخواست ڈائریکٹوریٹ جنرل نرسنگ (ڈی جی نرسنگ) کے ذریعے پروگرام امپلیمنٹیشن یونٹ تک پہنچانی ہے۔ حکومت نے واضح کیا ہے کہ دستاویزات براہ راست پی آئی یو کو نہ بھیجی جائیں، بلکہ مقررہ دفتر کے ذریعے جمع کرائی جائیں۔

ایک اہم بات یہ بھی ہے کہ جو فیکلٹی ممبران کسی تسلیم شدہ یونیورسٹی میں داخلے کے لیے درخواست دے چکے ہیں، انہیں داخلے کی پیشکش مل گئی ہے یا وہ پہلے ہی داخلہ لے چکے ہیں، وہ بھی اپنے دستاویزات جمع کرا سکتے ہیں۔ لیکن یونیورسٹی میں داخلہ مل جانے کا مطلب یہ نہیں کہ اسکالرشپ بھی پکی ہو گئی — ہر درخواست کا جائزہ مقررہ شرائط کے مطابق لیا جائے گا اور حتمی فیصلہ پروگرام امپلیمنٹیشن یونٹ کرے گا۔