حکومت پنجاب نے مریم کو بتائیں پروگرام کے تحت مالی مشکلات کا شکار مستحق افراد کو 10 ہزار روپے کی امداد فراہم کرنے کا طریقہ کار واضح کر دیا ہے۔ پروگرام کے آفیشل ایکس اکاؤنٹ پر جاری معلومات کے مطابق، جن درخواست گزاروں کی مالی امداد منظور ہوگی، انہیں ان کے رجسٹرڈ موبائل نمبر پر جیز کیش کی جانب سے تصدیقی پیغام اور پن کوڈ موصول ہوگا۔
پیغام ملنے کے بعد مستحق افراد قریبی مجاز جیز کیش سینٹر جائیں گے، جہاں شناخت کی تصدیق کے بعد انہیں 10 ہزار روپے فراہم کیے جائیں گے۔
حکومت کی جانب سے جاری ہدایات کے مطابق، منظوری اور تصدیقی پیغام موصول ہونے کے بعد درخواست گزاروں کو 15 دن کے اندر اپنی امدادی رقم وصول کرنا ہوگی۔
مالی امداد کے خواہش مند شہری تین طریقوں سے درخواست جمع کرا سکتے ہیں: ہیلپ لائن 1000 پر کال کرکے، مریم کو بتائیں کی موبائل ایپ کے ذریعے، یا پروگرام کے سرکاری ویب پورٹل پر اپنی درخواست جمع کرا کر۔ رجسٹریشن کے دوران درخواست گزاروں کو اپنا شناختی کارڈ نمبر اور دیگر ضروری ذاتی معلومات فراہم کرنا ہوں گی۔
درخواست جمع ہونے کے بعد متعلقہ حکام اس کی جانچ پڑتال کریں گے اور درخواست گزار کی مالی امداد کے لیے اہلیت کا تعین کیا جائے گا۔ صرف رجسٹریشن کروانے سے 10 ہزار روپے ملنے کی ضمانت نہیں؛ امداد صرف ان افراد کو دی جائے گی جن کی درخواست منظور ہوگی اور جو پروگرام کی شرائط پر پورا اتریں گے۔








