باغ میں تجاوزات کے خلاف آپریشن کل سے شروع ہوگاآزاد کشمیر

ڈپٹی کمشنر نے کہا کہ تمام تاجروں کو قبل از وقت آگاہ کرنے کا مقصد یہی ہے کہ جن لوگوں نے تجاوزات قائم کی ہوئی ہیں وہ آپریشن سے قبل خود انہیں ہٹا دیں، بصورت دیگر انہیں ہٹا دیا جائے گا۔

رپورٹ کے مطابق ڈپٹی کمشنر نے کہا، “ہم سب نے مل کر شہر کو مکمل طور پر ٹریفک کے ہجوم سے آزاد کروانا ہے اور جہاں جہاں تجاوزات کی گئی ہیں انہیں ختم کیا جائے گا۔”

انہوں نے کہا کہ شہر کے اندر مختلف جگہوں پر پارکنگ پوائنٹس قائم کیے جا رہے ہیں اور تھڑوں اور ریڑھیوں کی وجہ سے ٹریفک کی روانی میں پیش آنے والی مشکلات سے نمٹنے کے لیے منصوبہ تیار کر لیا گیا ہے۔ بلا تخصیص کارروائی ہوگی تاکہ عام شہری باعزت طریقے سے شہر کا رخ کر سکے۔

ڈپٹی کمشنر نے کہا کہ شہر کے ہر چوک میں کھڑے بائیک اور رکشے ٹریفک کے لیے سب سے بڑا مسئلہ ہیں، ان کے لیے الگ جگہ مقرر کر کے انہیں اسٹینڈ میں رکھا جائے گا اور کسی بھی چوک پر کوئی رکشہ یا بائیک کھڑا نہیں ہوگا۔

انہوں نے کہا کہ شہر میں چلنے والی جس گاڑی یا موٹر سائیکل کے پاس کاغذات نہیں ہوں گے اس کے خلاف سخت ترین کارروائی کی جائے گی۔ شہر کے اندر موجود تمام مساجد اور مدارس سے کہا گیا ہے کہ وہ نماز کے اوقات میں اپنے پارکنگ گیٹ کھلے رکھیں تاکہ نمازی حضرات مساجد کی پارکنگ میں گاڑی اور موٹر سائیکل لگا کر نماز ادا کر سکیں۔

ڈپٹی کمشنر نے کہا کہ بڑی گاڑیوں کا صبح ساڑھے سات بجے کے بعد شہر کے اندر داخلہ ممنوع ہوگا اور کسی بھی قسم کی لوڈر گاڑی ساڑھے سات بجے کے بعد شہر میں داخل نہیں ہو سکے گی۔

انہوں نے شہر میں پھل اور سبزی لانے والے ہول سیلرز سے کہا کہ وہ اپنے معیار اور سبزی و پھل کی کوالٹی دونوں بہتر کر لیں، کیونکہ یہ نہیں ہو سکتا کہ عام شہری سے ایک نمبر چیز کی قیمت وصول کی جائے جبکہ کوالٹی دس نمبر والی بھی نہ ہو۔ انہوں نے کہا کہ کرایوں کا تعین پٹرول اور ڈیزل کی قیمت بڑھنے سے جس تناسب سے بڑھتا ہے اسی تناسب سے کمی بھی کی جائے گی۔

ڈپٹی کمشنر نے کہا کہ انتظامیہ کا کام عوام کو سہولت دینا اور عام شہری کو ریلیف دینا ہے۔