اجلاس میں چیئرمین ضلع کونسل غلام مجتبیٰ مغل، ڈائریکٹر یونیورسٹی ڈاکٹر لعل حسین، اسسٹنٹ کمشنر ہیڈکوارٹر آٹھمقام چوہدری محمد بشارت، اسسٹنٹ کمشنر شاردہ عاصم ندیم، ڈی ایس پی راجہ امجد، میڈیکل سپرنٹنڈنٹ ڈاکٹر معاذ خطیب، ڈسٹرکٹ فارسٹ آفیسر سردار اکرم سمیت زراعت، تعلیم، سیاحت، فوڈ سیفٹی، لائیو اسٹاک، شہری دفاع، ڈیزاسٹر مینجمنٹ، تعمیرات عامہ اور ریوینیو سمیت دیگر محکموں کے سربراہان نے شرکت کی۔ ہر محکمے کے سربراہ نے اپنے محکمے کی مجموعی کارکردگی، دستیاب وسائل، درپیش مسائل اور جاری ترقیاتی منصوبوں کے بارے میں ڈپٹی کمشنر کو بریفنگ دی۔
محکمانہ سربراہان نے فنڈز کے استعمال، منصوبوں کی پیش رفت اور تاخیر کی وجوہات پر بھی تفصیلی بریفنگ دی۔ انہوں نے افرادی قوت کی کمی، مالی وسائل کی قلت اور مشینری کی عدم دستیابی کو کام میں رکاوٹ کی بڑی وجوہات قرار دیا اور ان مسائل کے حل کے لیے قابل عمل تجاویز بھی پیش کیں۔
اجلاس میں آئندہ تین ماہ کے لیے ترجیحی اہداف، عوامی مسائل کے حل، محکموں کی کارکردگی میں بہتری اور ضلعی انتظامیہ کے ساتھ بہتر روابط پر بھی غور کیا گیا۔ ڈپٹی کمشنر نے کہا کہ عوام کے مسائل کا فوری حل اور ترقیاتی کاموں کی بروقت تکمیل ہی انتظامیہ کی کامیابی کا پیمانہ ہوگی۔
سید معظم گیلانی نے رواں ہفتے ضلع نیلم کے ڈپٹی کمشنر کا عہدہ سنبھالا ہے۔ ان سے قبل چوہدری اقبال حسن اس عہدے پر تھے جنہیں ڈپٹی سیکرٹری کھیل، نوجوانان و ثقافت، سیاحت اور آثار قدیمہ تعینات کیا گیا ہے۔ نیلم آزاد کشمیر کا دور افتادہ اور پہاڑی ضلع ہے، جہاں ضلعی انتظامیہ کی کارکردگی کا براہ راست اثر دور دراز علاقوں کے عوام پر پڑتا ہے، اور نئے ڈپٹی کمشنر کا پہلا اجلاس اس بات کا اشارہ ہے کہ عوامی سہولت ان کی انتظامیہ کی اولین ترجیح رہے گی۔
