
رانا ثنا اللہ: 27 ویں ترمیم پر بلاول کا بیان ان کی نااہلی کا خطرہ پیدا کر سکتا ہےPakistan
کیپٹل ٹاک میں گفتگو کرتے ہوئے رانا ثنا اللہ نے کہا کہ 27 ویں ترمیم پر بلاول بھٹو کے بیان سے ان کی نااہلی بھی ہو سکتی ہے، جبکہ نئے صوبوں کی بحث ابھی پارلیمنٹ میں داخل نہیں ہوئی۔

وزیراعظم کے مشیر برائے سیاسی امور رانا ثنا اللہ نے کہا ہے کہ بلاول بھٹو کا یہ بیان کہ 27 ویں ترمیم جبری اکثریت سے کی گئی، ان کی نااہلی کا خطرہ پیدا کر سکتا ہے۔
جیو نیوز کے پروگرام کیپٹل ٹاک میں گفتگو کرتے ہوئے رانا ثنا اللہ نے کہا کہ اگر ایک پارٹی کا لیڈر یہ کہے کہ اس نے دباؤ میں آکر آئینی ترمیم پر ووٹ دیا ہے تو اس بیان سے ان کی نااہلی بھی ہو سکتی ہے۔ انہوں نے کہا کہ بلاول بھٹو 27 ویں ترمیم کے تحت بننے والے جوڈیشل کمیشن کے بینیفشری ہیں اور اس کے رکن بھی ہیں، اور بلاول نے سندھ کی تقسیم کے معاملے پر ناراضی میں یہ باتیں کی ہیں۔
رانا ثنا اللہ کا کہنا تھا کہ نئے صوبوں کی بحث ابھی پارلیمنٹ میں داخل نہیں ہوئی، اور کابینہ میں بھی اس پر بات نہیں ہوئی۔ انہوں نے کہا کہ پارلیمنٹ وہ جگہ ہے جہاں فیصلہ ہونا ہے کہ نئے صوبے بننے ہیں یا نہیں، اور اگر ریفرنڈم ہونا ہے تو اس کا فیصلہ بھی پارلیمنٹ کو کرنا ہے۔ نئے صوبے اتفاق رائے سے ہی بنیں گے، اور ریفرنڈم کے ذریعے عوام کی رائے معلوم کی جا سکتی ہے۔
ان کا کہنا تھا کہ گلگت بلتستان اور آزاد کشمیر الیکشن میں تلخیوں کے باوجود جماعتوں نے اتفاق سے چلنے پر اتفاق کیا تھا، اور بلاول کی باتوں کا جواب دینے کا مطلب یہ نہیں کہ دونوں جماعتیں آمنے سامنے آ گئی ہیں۔





