سپریم کورٹ کے سینئر جج جسٹس رضا علی خان نے آزاد جموں و کشمیر کے قائم مقام چیف جسٹس کے عہدے کا حلف اٹھا لیا ہے۔
صدر آزاد جموں و کشمیر ڈاکٹر محمد نجیب خان نے مظفرآباد میں منعقدہ تقریب حلف برداری میں ان سے قائم مقام چیف جسٹس آزاد کشمیر کے عہدے کا حلف لیا۔ حلف برداری سے قبل سیکرٹری قانون انصاف و پارلیمانی امور محمد ادریس عباسی نے جسٹس رضا علی خان کی تقرری کا نوٹیفکیشن پڑھ کر سنایا۔
تقریب حلف برداری میں اسپیکر قانون ساز اسمبلی چوہدری طارق فاروق، جج سپریم کورٹ جسٹس خالد یوسف چوہدری، چیف جسٹس ہائی کورٹ جسٹس سردار لیاقت حسین، سینئر جج ہائی کورٹ جسٹس سید شاہد بہار اور جج ہائی کورٹ جسٹس محمد اعجاز خان نے خصوصی شرکت کی۔
تقریب میں چیف الیکشن کمشنر جسٹس (ر) غلام مصطفی مغل، سابق چیف جسٹس منظور حسین گیلانی، سابق چیف جسٹس سردار ابراہیم ضیاء، ایڈووکیٹ جنرل محمد ندیم خان، محتسب آزاد کشمیر محمد عارف راٹھور، صدر سپریم کورٹ بار ایسوسی ایشن فیاض حیدر نوابی اور وکلا کی کثیر تعداد بھی شریک ہوئی۔








