اسلام آباد: صدر مملکت آصف علی زرداری اور وزیراعظم شہباز شریف نے اتوار کو دیوالی کے موقع پر دنیا بھر، بالخصوص پاکستان میں مقیم ہندو برادری کو مبارکباد دی ہے۔ ریڈیو پاکستان کے مطابق دونوں رہنماؤں نے اپنے الگ الگ پیغامات میں دیوالی کو نفرت، عدم برداشت اور مایوسی پر روشنی کی فتح قرار دیا اور پرامن بقائے باہمی کے فروغ پر زور دیا۔
وزیراعظم شہباز شریف نے سوشل میڈیا پلیٹ فارم ایکس پر اپنے پیغام میں کہا کہ دیوالی منانے والے تمام افراد کو مبارکباد، یہ روشنیوں کا تہوار آپ کی زندگیوں میں امن، صحت، خوشی اور خوشحالی لائے۔ وزیراعظم آفس کی جانب سے جاری بیان میں کہا گیا کہ وزیراعظم نے دنیا بھر، بالخصوص پاکستان میں مقیم ہندو برادری کو دل کی گہرائیوں سے مبارکباد دی ہے۔
وزیراعظم نے اپنے پیغام میں کہا کہ ہندو برادری ملک کے سماجی تانے بانے میں پیوست ہے اور حکومت ہر شہری کے حقوق، وقار اور مذہبی آزادیوں کے تحفظ کے لیے پرعزم ہے، خواہ اس کا تعلق کسی بھی مذہب، عقیدے یا نسل سے ہو۔ انہوں نے کہا کہ آئین پاکستان تمام شہریوں کو مذہبی آزادی کی ضمانت دیتا ہے اور اقلیتوں کے حقوق کے تحفظ کی یقین دہانی کراتا ہے۔
صدر آصف علی زرداری نے کہا کہ مذہبی اقلیتوں کے حقوق کا تحفظ ہم سب کی مشترکہ ذمہ داری ہے اور یہ بات سب پر واضح ہونی چاہیے۔ انہوں نے کہا کہ ہندو برادری قومی زندگی کا بنیادی حصہ ہے اور تعلیم، صحت، کاروبار، عوامی خدمت، فلاح و بہبود اور فنون و ثقافت کے شعبوں میں ان کی خدمات نے ملک کو مالا مال کیا ہے۔
دونوں رہنماؤں نے کہا کہ دیوالی کا تہوار ذاتی تعلقات اور سماجی زندگی میں پرامن بقائے باہمی کو فروغ دیتا ہے۔ دیوالی ہندو مذہب کے سب سے بڑے تہواروں میں سے ایک ہے جو چراغاں کرنے کی وجہ سے روشنیوں کے تہوار کے طور پر جانا جاتا ہے۔ پاکستان میں ہندو برادری ملک کی قدیم ترین مذہبی برادریوں میں سے ایک اور سب سے بڑی غیر مسلم آبادیوں میں سے ایک ہے۔
دوسری جانب انسانی حقوق کمیشن پاکستان کی حالیہ سالانہ رپورٹ میں مذہبی اقلیتوں کو درپیش امتیازی سلوک اور مذہبی آزادی کی خلاف ورزیوں پر تشویش کا اظہار کیا گیا ہے۔ رپورٹ کے مطابق اقلیتوں کو تاحال امتیاز اور مذہبی آزادی کی پامالی کا سامنا ہے، جس کے باعث اقلیتوں کے حقوق کے تحفظ کی اہمیت مزید بڑھ گئی ہے۔
