گیس اور بجلی کے سلیب ختم کرنے کی تیاری، نیا نظام تیارکاروبار

تاہم نئے طریقہ کار کی حتمی تفصیلات اور اس کے تحت صارفین کے لیے مقرر کردہ معیار سے متعلق مزید فیصلے ہونا باقی ہیں۔ ذرائع کا کہنا ہے کہ سبسڈی کے نئے نظام پر عمل درآمد کا فیصلہ نائب وزیراعظم اسحاق ڈار کی سربراہی میں قائم اسٹیئرنگ کمیٹی کرے گی۔ نئے طریقہ کار کو باقاعدہ نافذ کرنے سے پہلے اس کا ٹیسٹ رن بھی کیا جائے گا تاکہ ممکنہ مسائل کی نشاندہی اور ضروری اصلاحات کی جا سکیں۔

آئی ایم ایف کی ٹائم لائن اور حکومت کا موقف

دوسری جانب عالمی مالیاتی فنڈ (آئی ایم ایف) نے نئے سبسڈی نظام کے نفاذ کے لیے واضح ٹائم لائن دی ہے۔ عالمی مالیاتی ادارہ چاہتا ہے کہ بجلی صارفین کے لیے یکم جنوری 2027 اور گیس صارفین کے لیے فروری 2027 سے نیا طریقہ کار نافذ کر دیا جائے۔ تاہم حکومت موجودہ سبسڈی نظام کو 30 جون 2027 تک برقرار رکھنے کی خواہش مند ہے۔

ذرائع کے مطابق وزیراعظم شہباز شریف کی ہدایت پر موجودہ ریلیف میں مزید چھ ماہ کی توسیع کا معاملہ آئی ایم ایف کے سامنے اٹھایا جائے گا۔ حکومت بالخصوص 200 یونٹ تک بجلی استعمال کرنے والے صارفین کو موجودہ سبسڈی میں مزید چھ ماہ کی توسیع دینے کے لیے کوشاں ہے، اور اس حوالے سے عالمی مالیاتی فنڈ کو قائل کرنے کی کوشش کی جائے گی تاکہ کم بجلی استعمال کرنے والے گھریلو صارفین کو فوری طور پر اضافی مالی بوجھ کا سامنا نہ کرنا پڑے۔

اس سے قبل سامنے آنے والی رپورٹس کے مطابق مستحق صارفین کی سماجی و اقتصادی رجسٹری عالمی بینک کے تعاون سے تیار کی جا رہی ہے، صارفین کی رجسٹریشن نومبر 2026 تک مکمل کرنے کا ہدف مقرر کیا گیا تھا، اور ڈیٹا کی تصدیق کے بعد اسے بے نظیر انکم سپورٹ پروگرام کے ریکارڈ سے منسلک کیا جائے گا۔

اب سب کی نظریں اسٹیئرنگ کمیٹی کے فیصلے اور آئی ایم ایف کے ساتھ ہونے والے مذاکرات پر ہیں۔ ان فیصلوں سے طے ہوگا کہ بجلی اور گیس کے صارفین کے لیے سبسڈی کا نیا نظام کب نافذ ہوگا اور موجودہ ریلیف میں توسیع کی حکومتی کوشش کس حد تک کامیاب ہوتی ہے۔