وانواٹو میں 7.2 شدت کا زلزلہ، سونامی کی وارننگ جاریدنیا

زلزلے کا مرکز سولا سے تقریباً 200 کلومیٹر مغرب میں تھا۔ سولا، وانووا لاوا جزیرے پر واقع بینکس جزائر کا مرکزی قصبہ ہے، جبکہ مرکز اسپیریٹو سانٹو کے شمال مغرب میں تھا جہاں ملک کا دوسرا بڑا شہر لوگان ویل واقع ہے۔

نیوز ایجنسیوں کی رپورٹس کے مطابق ابھی تک کسی جانی یا مالی نقصان کی اطلاع موصول نہیں ہوئی۔ نیوزی لینڈ کے نشریاتی ادارے ون نیوز کی رپورٹ کے مطابق نیوزی لینڈ کے لیے فی الحال کسی خطرے کی نشاندہی نہیں کی گئی۔

وانواٹو ‘رنگ آف فائر’ کے زلزلہ خیز پٹی پر واقع ایک نشیبی جزیرہ نما ملک ہے جہاں زلزلے معمول ہیں۔ یہ پٹی جنوب مشرقی ایشیا سے بحرالکاہل کے طاس تک پھیلی ہوئی ہے اور زلزلیاتی سرگرمیوں کا مرکز سمجھی جاتی ہے۔

ماہرین کے مطابق 10 کلومیٹر جیسی کم گہرائی کے زلزلے زیادہ خطرناک سمجھے جاتے ہیں کیونکہ ان کی توانائی زمین کی سطح کے قریب خارج ہوتی ہے، جس سے ساحلی علاقوں میں زیادہ نقصان کا خدشہ ہوتا ہے۔

پیسیفک سونامی وارننگ سینٹر سمندر کے اندر آنے والے زلزلوں کی نگرانی کرتا ہے اور ممکنہ سونامی کی لہروں کے بارے میں انتباہ جاری کرتا ہے۔ مرکز نے کہا کہ یہ انتباہ ابتدائی پیرامیٹرز کی بنیاد پر جاری کیا گیا ہے اور ساحلی علاقوں کے لوگوں کو مقامی حکام کی ہدایات پر عمل کرنا چاہیے۔

زلزلے کے بعد امدادی اور نگران ادارے صورتحال کی مسلسل نگرانی کر رہے ہیں اور متاثرہ علاقوں سے مزید تفصیلات کا انتظار ہے۔ ماہرین کے مطابق سونامی کی وارننگ احتیاطی تدبیر کے طور پر جاری کی گئی ہے اور اصل صورتحال کا اندازہ نگرانی کے بعد ہی لگایا جا سکے گا۔