ایشیائی ترقیاتی بینک (اے ڈی بی) نے پاکستان کے وفاقی سول پینشن نظام میں اصلاحات کے لیے 50 کروڑ ڈالر کا نتائج پر مبنی قرض منظور کر لیا ہے۔ ایسوسی ایٹڈ پریس آف پاکستان کے مطابق قرض کی منظوری منگل کو دی گئی۔
اے ڈی بی کے اعلامیے کے مطابق 50 کروڑ ڈالر کا قرض حکومت پاکستان کے پینشن اصلاحات پر عمل درآمد کے منصوبے کے پہلے مرحلے اور ڈیفائنڈ کنٹری بیوشن پینشن اسکیم کی جانب منتقلی کے لیے دیا جائے گا، جس میں جولائی 2024 سے بھرتی ہونے والے وفاقی ملازمین کو شامل ہونا لازم ہے۔
اعلامیے میں کہا گیا ہے کہ اصلاحات سے پینشن سے متعلق بڑھتے ہوئے مالی دباؤ کو قابو میں لانے، پینشن نظام کی پائیداری مضبوط کرنے اور ترقیاتی و سماجی اخراجات کے لیے مالی گنجائش پیدا کرنے میں مدد ملے گی۔
اے ڈی بی کے مطابق وفاقی پینشن اخراجات مالی سال 2016 سے اب تک تقریباً پانچ گنا بڑھ چکے ہیں اور اب سالانہ ایک کھرب روپے سے تجاوز کر گئے ہیں۔ پرانا پینشن نظام غیر فنڈڈ تھا جس کی وجہ سے سارا بوجھ بجٹ پر تھا۔
اے ڈی بی کا کہنا ہے کہ نیا نظام پینشن کے انتظام، شفافیت اور ڈیجیٹل سسٹم کو بہتر بنائے گا اور اصلاحات سے ترقیاتی اور سماجی اخراجات کے لیے مالی گنجائش پیدا ہو گی۔ پاکستان میں اے ڈی بی کی کنٹری ڈائریکٹر ایما فین کا کہنا ہے کہ پاکستان نے پینشن نظام مضبوط بنانے کے لیے اہم اقدامات کیے ہیں۔
یہ منظوری 11 نومبر کو پاکستان کے لیے منظور کی گئی 50 کروڑ ڈالر کی ہنگامی آفات سے نمٹنے کی مالی سہولت سے الگ ہے، جس کا مقصد ملک کو قدرتی آفات سے نمٹنے کی تیاری اور ردعمل میں مدد دینا ہے۔








