پاکستان کسٹمز انفورسمنٹ نے کراچی میں اسمگلنگ کے خلاف تین بڑی کارروائیاں کی ہیں، جن میں 14 کروڑ 53 لاکھ 76 ہزار روپے مالیت کا ممنوعہ اور اسمگل شدہ سامان ضبط کیا گیا ہے۔
پہلی کارروائی میں کسٹمز حکام نے 20 ہزار کلو گرام کٹی ہوئی سپاری برآمد کی، جس کی مالیت 7 کروڑ 40 لاکھ روپے ہے، اس کے ساتھ دو ٹریلر اور چار کنٹینر بھی ضبط کیے گئے۔
حکام نے جانوروں کی خوراک میں استعمال ہونے والے مشتبہ خام مال کے 30 ہزار کلو گرام بھی برآمد کیے، جن کی نوعیت اور ترکیب معلوم کرنے کے لیے لیبارٹری ٹیسٹ کیا جائے گا۔
کاٹھور سپر ہائی وے پر ایک اور کارروائی میں پاکستان کسٹمز نے بھارت میں تیار کردہ برانڈڈ گٹکے کے 12 لاکھ 72 ہزار 800 پاؤچ اور 12 ہزار 480 پیکٹ ضبط کیے۔ ضبط شدہ سامان، ٹریلرز اور کنٹینرز کی کل مالیت 3 کروڑ 47 لاکھ 56 ہزار روپے لگائی گئی ہے۔
کسٹمز حکام نے گٹکا اسمگلنگ میں ملوث افراد کے خلاف فوجداری اور دیوانی کارروائی شروع کر دی ہے۔








