وزیراعظم محمد شہباز شریف نے کہا ہے کہ حکومت نوجوانوں کو اپنے کاروبار شروع کرنے، انہیں وسعت دینے اور بین الاقوامی منڈیوں تک رسائی کے مواقع فراہم کرنے کے لیے پرعزم ہے۔
وزیراعظم ہاؤس اسلام آباد میں وزیراعظم سے اینڈیور گروپ کے وفد نے ملاقات کی، جس میں پاکستان میں کاروباری سرگرمیوں، اسٹارٹ اپس کے فروغ اور عالمی سرمایہ کاروں کے ساتھ روابط بڑھانے کے امکانات پر تبادلہ خیال کیا گیا۔
وزیراعظم نے کہا کہ پاکستان کے باصلاحیت نوجوانوں میں کاروباری صلاحیتوں کی کوئی کمی نہیں، اور حکومت نوجوانوں کو اپنے کاروبار شروع کرنے، انہیں وسعت دینے اور بین الاقوامی منڈیوں تک رسائی کے مواقع فراہم کرنے کے لیے پرعزم ہے۔
ان کا کہنا تھا کہ جدید ٹیکنالوجی، جدت اور کاروباری سوچ پاکستان کی معاشی ترقی کے اہم محرکات ہیں۔ حکومت اس شعبے میں سرمایہ کاری اور نجی شعبے کے ساتھ اشتراک کو فروغ دے رہی ہے تاکہ نوجوانوں کو کاروبار کے بہتر مواقع میسر آ سکیں۔
وزیراعظم نے بتایا کہ حال ہی میں اسلام آباد میں انفارمیشن ٹیکنالوجی پارک کا افتتاح کیا گیا ہے، جہاں اسٹارٹ اپس کے لیے ہر ممکن سہولیات فراہم کی گئی ہیں۔ آئی ٹی پارک کو تعلیمی اداروں اور صنعت کے مؤثر اشتراک سے جدید آئی ٹی ایکو سسٹم کا مرکز بنایا جائے گا۔
وزیراعظم نے اینڈیور گروپ کے عالمی تجربے اور پاکستان میں کاروباری صلاحیتوں کے فروغ کے لیے خدمات کو سراہتے ہوئے کہا کہ عالمی سطح پر کامیاب کاروباری اداروں کے تجربات سے فائدہ اٹھا کر پاکستانی اسٹارٹ اپس کو بین الاقوامی منڈیوں تک رسائی کے مواقع فراہم کیے جا سکتے ہیں۔ انہوں نے اینڈیور گروپ پر زور دیا کہ وہ پاکستانی کاروباری افراد کی استعداد کار میں اضافے، عالمی سطح پر ان کی رہنمائی اور بین الاقوامی سرمایہ کاروں کے ساتھ روابط مضبوط بنانے میں اپنا کردار مزید مؤثر بنائے۔
ملاقات کے دوران وفد نے وزیراعظم کو اینڈیور گروپ کی عالمی سرگرمیوں اور پاکستان میں جاری آپریشنز سے متعلق بریفنگ دی۔








