اسلام آباد: پاکستان کا سب سے بڑا سیاحتی، کھیل اور فیملی فیسٹیول جمعے کو اسلام آباد اسپورٹس کمپلیکس میں شروع ہو گیا۔ تین روزہ فیسٹیول وزارت بین الصوبائی رابطہ کی قیادت میں منعقد ہو رہا ہے، جبکہ پاکستان ٹورازم ڈویلپمنٹ کارپوریشن اس کی مرکزی انتظامی ادارہ ہے۔
افتتاحی تقریب میں وفاقی وزیر برائے منصوبہ بندی، ترقی و خصوصی اقدامات احسن اقبال، وزیراعظم کے کوآرڈینیٹر برائے سیاحت سردار یاسر الیاس خان، سفارتی برادری کے ارکان اور پی ٹی ڈی سی کے منیجنگ ڈائریکٹر آفتاب الرحمٰن رانا نے شرکت کی۔
احسن اقبال نے اسٹالز کے دورے کے بعد میڈیا سے گفتگو کرتے ہوئے کہا کہ پاکستان میں سیاحت کے وسیع مواقع موجود ہیں اور پاکستانی عوام کی مہمان نوازی ملک کی عالمی سطح پر پہچان ہے۔ انہوں نے کہا کہ حکومت سیاحت کے شعبے کی ترقی کے لیے پرعزم ہے اور پاکستان کو دنیا کے سامنے ایک متحد سیاحتی منزل کے طور پر متعارف کرانا ضروری ہے۔
وفاقی وزیر نے کہا کہ پاکستان قدرتی حسن اور سیاحتی وسائل سے مالا مال ہے، تاہم اس کی بے پناہ صلاحیت سے بھرپور فائدہ اٹھانے کے لیے مؤثر حکمت عملی ناگزیر ہے۔ ان کے مطابق سیاحت پاکستان کو 2035 تک ایک کھرب ڈالر کی معیشت بنانے کے وژن میں اہم ستون کا کردار ادا کرے گی۔
افتتاحی روز مہم جوئی کی سیاحت توجہ کا مرکز رہی۔ پیراگلائیڈنگ، پیرا موٹر پرواز، گرم ہوا کے غبارے کی سیر، گھڑ سواری، ہیوی بائیک شو اور کار شو نے شرکا کی توجہ حاصل کی۔ تمام صوبوں کی ثقافتی جھلک پیش کرنے والے اسٹالز کے ساتھ سفارتی برادری کے اسٹالز بھی لگائے گئے، جہاں مختلف ممالک نے اپنے ثقافتی ورثے، سیاحتی مقامات، روایات اور مخصوص کھانوں کی نمائش کی۔
پنجاب، سندھ، خیبر پختونخوا، بلوچستان، گلگت بلتستان اور آزاد جموں و کشمیر کے محکمہ ہائے سیاحت، پی ٹی ڈی سی اور نجی سیاحتی کمپنیاں اس قومی سطح کی سرگرمی کا حصہ ہیں۔ فیسٹیول میں روایتی پاکستانی کھانے، معروف برانڈز کے اسٹالز اور مختلف صوبوں کی خواتین دستکاروں کی دستکاریوں کی وسیع نمائش بھی کی گئی ہے۔ فیسٹیول میں ایک میڈیکل ٹورازم زون بھی قائم کیا گیا ہے، جہاں نجی اسپتال اور صحت کے ادارے اپنی خدمات پیش کر رہے ہیں۔
افتتاحی تقریب سے خطاب کرتے ہوئے سردار یاسر الیاس خان نے سیاحت کے فروغ، ثقافتی سفارتکاری اور علاقائی رابطے کی اہمیت پر روشنی ڈالی۔ انہوں نے کہا کہ اس نوعیت کے عالمی میلے پاکستان کے ثقافتی ورثے، قدرتی حسن، سیاحتی امکانات اور سرمایہ کاری کے مواقع دنیا کے سامنے پیش کرنے کا مؤثر ذریعہ ہیں، اور سرکاری و نجی اشتراک بین الاقوامی سیاحت کو فروغ دیتا ہے۔
فیسٹیول کے سلسلے میں سیاحت سے متعلق ایک اعلیٰ سطحی وزارتی کانفرنس بھی منعقد ہو رہی ہے، جس میں وفاقی و صوبائی حکام اور نجی شعبے کے نمائندے سیاحت کی ترقی، مقامات کی برانڈنگ، سرمایہ کاری میں سہولت اور پائیدار سیاحت جیسے امور پر غور کر رہے ہیں۔
فیسٹیول کا مقصد ملکی سیاحت، صحت مند طرز زندگی اور قومی یکجہتی کا فروغ ہے۔ سرکاری شیڈول کے مطابق آج ہفتے کو ایف نائن پارک میں نیزہ بازی کے مقابلے ہوں گے، جبکہ تین روزہ میلہ اتوار 8 نومبر تک جاری رہے گا اور اس میں موسیقی کی شامیں، لالٹینوں کی پرواز، آتش بازی اور کھیلوں کے مختلف مقابلے شامل ہیں۔ تمام زائرین کے لیے داخلہ مفت ہے۔
