اسلام آباد — وفاقی دارالحکومت میں بلدیاتی انتخابات کی تیاریاں مکمل ہونے کے بعد چیف الیکشن کمشنر سکندر سلطان راجا نے 10 نومبر کو ایک اہم اجلاس طلب کر لیا ہے۔ اس اجلاس میں سیکرٹری داخلہ، چیف کمشنر اور آئی جی اسلام آباد انہیں سکیورٹی پلان پر بریفنگ دیں گے۔
ہم نیوز کی رپورٹ کے مطابق چیف الیکشن کمشنر کو بریفنگ میں بتایا گیا کہ بلدیاتی انتخابات کے لیے تمام انتخابی میٹریل کی خریداری سمیت تمام تیاریاں مکمل کر لی گئی ہیں۔ بیلٹ پیپرز کی پرنٹنگ کے تمام انتظامات بھی مکمل ہیں، جبکہ آئی جی اور ڈپٹی کمشنر اسلام آباد کو ضروری انتظامات کے حوالے سے خطوط ارسال کیے جا چکے ہیں۔
الیکشن کمیشن نے 20 اکتوبر کو اسلام آباد میں بلدیاتی الیکشن کا شیڈول جاری کیا تھا، جس کے مطابق وفاقی دارالحکومت میں 20 دسمبر کو پولنگ ہوگی۔
یاد رہے کہ وفاقی دارالحکومت میں آخری بلدیاتی انتخابات 2015 میں ہوئے تھے، جن کے نتیجے میں بننے والی منتخب بلدیاتی حکومت کی مدت 14 فروری 2021 کو ختم ہو گئی تھی۔ قانون کے تحت مدت ختم ہونے کے بعد 120 دن کے اندر نئے انتخابات کرانا ضروری تھے، لیکن قانون میں بار بار تبدیلیوں اور انتظامی مسائل کے باعث انتخابی عمل 5 سال سے تعطل کا شکار ہے۔
